FSMMIPA

ዜና

አምራቾች ምርቶቻቸውን በቀላሉ ለተጠቃሚዎች ማድረስ የሚችሉበት ሸጋ የተሰኘ የኤሌክትሮኒክስ ግብይት ፕላት ፎርም ይፋ ተደረገ

በሸጋ የኤሌክትሮኒክስ ግብይት ስረዓት ዙሪያ ለባለስልጣን መ/ቤቱ አመራሮች ገለጻ ተደርጓል፡፡

የክፍያ ፋይናንሺያል ቴክኖሎጂ ጥቃቅን፣ አነስተኛና መካከለኛ አምራች ኢንዱስትሪዎች ምርቶቻቸውን በቀላሉ ለተጠቃሚዎች ማድረስ የሚችሉበት #ሸጋ http://www.shega.com የተሰኘ የኤሌክትሮኒክስ ግብይት ስርዓትን ይፋ አድርጓል፡፡

በኤሌክትሮኒክስ ግብይት ስርዓቱ ዙሪያ ለባለስልጣን መ/ቤቱ አመራሮች ዛሬ ሐምሌ 8/2013 ዓ.ም ገለጻ በተደረገበት ወቅት የባለስልጣኑ ፋሲሊቴሽን ዘርፍ ም/ዋና ዳይሬክተር የሆኑት አቶ ዳንኤል ኦላኒ እንደገለጹት ባለስልጣን መ/ቤቱ የኢንዱስትሪዎችን የገበያ ተጠቃሚነት ለማሳደግ የተለያዩ ስራዎችን ሲሰራ መቆየቱን አስታውሰዋል፡፡

በሀገራችን ተጨባጭ ሁኔታ ከአምራቾችም ሆነ ከሸማቹ ይልቅ ይበልጥ እየተጠቀሙ ያሉት በመሀል የሚገኙት ደላላዎች መሆናቸውን የተናገሩት ም/ዋና ዳይሬክተሩ የኤሌክትሮኒክ ግብይት ስርዓቱ ይህን በማስቀረት አምራቾች ምርታቸውን በቀላሉ ለተጠቃሚዎች ማድረስ የሚችሉበትና ተጠቃሚ የሚሆኑበት መንገድ በመሆኑ ሚናው የጎላ መሆኑን ተናግረዋል፡፡

የኤሌክትሮኒክ ግብይት የሀገር ምርትን ከመጠቀም አንጻር ከፍተኛ አስተዋጽኦ እንዳለው የጠቆሙት ም/ዋና ዳይሬክተሩ አምራች ኢንዱስትሪዎችንም ወደህጋዊ መንገድ ለማምጣት እንደሚያግዝ ገልጸዋል፡፡

አቶ ዳንኤል በቀጣይም አገልግሎቱን ይበልጥ ለማስተዋወቅና ኢንዱስትሪዎችን ተጠቃሚ ለማድረግ ከክፍያ ፋይናንሺያል ቴክኖሎጂ ጋር የጋራ ስምምነት እንደሚያደርጉና በጋራ እንደሚሰሩ አስገንዝበዋል፡፡

በክፍያ ፋይናንሺያል ቴክኖሎጂ #የሸጋ ቢዝነስ ስትራቴጂ ማናጀር የሆኑት ወ/ሮ ስምረት አእምሮ  አጠቃላይ ስለድርጀቱና ስለፕላት ፎርሙ ገለጻ አድርገዋል፡፡

ከዚህ በፊት በብዙዎች ዘንድ የሚታወቀውን ‹ለሁሉ› የተሰኘ የክፍያ አገልግሎት ያስተዋወቀው ድርጅቱ አሁን ደግሞ የተለያዩ ፕሮጀክቶችን በመቅረጽ በኤሌክትሮኒክስ ግብይት ስርዓት ዙሪያ የተለያዩ ስራዎችን እየሰራ መሆኑን ተናግረዋል፡፡

ከእነዚህም ስራዎች አንዱ ‹#ሸጋ› የተሰኘ የኤሌክትሮኒክስ ግብይት ስርዓት መሆኑን የገለጹት ወ/ሮ ስምረት አገልግሎቱ ትኩረት የሚያደርገው የሀገር ውስጥ አምራቾች ላይ መሆኑን ገልጸዋል፡፡

ጥቃቅን፣ አነስተኛና መካከለኛ ኢንተርፕራይዞች ምርቶቻቸውን ለተጠቃሚው ህብረተሰብ በቀላሉ ማድረስ የሚችሉበትን ስርዓት መዘርጋታቸውን የገለጹት የቢዝነስ ስትራቴጂ ማናጀሯ ቴክኖሎጂው የሰዎችን የአኗኗር ዘይቤ ለማዘመንና ለማቅለል እንደሚረዳም ጠቁመዋል፡፡

ከኤሌክትሮኒክስ ግብይት ስርዓቱ ጎን ለጎን በፓኬጅንግ፣ በብራንዲንግና በሌሎች ስርዓቶች ዙሪያ ለኢንተርፕራይዞች ስልጠናና ድጋፍ እንዲሁም የብድር አገልግሎት እንደሚያመቻቹም አስታውቀዋል፡፡

አገልግሎቱን www.shega.com የሚለውን ዌብሳይት በመጠቀም በቀላሉ የሀገር ውስጥ ምርቶችን ማግኘት ስለሚቻል አምራቾች ይህንን እድል እንዲጠቀሙበት ጥሪ አቅርበዋል፡፡

በመድረኩ የባለስልጣን መ/ቤቱ ም/ዋና ዳይሬክተሮች፣ ዳይሬክተሮችና ቡድን መሪዎች ተሳታፊ ሆነዋል፡፡ በመድረኩም የተለያዩ አስተያየቶችና ጥያቄዎች የተነሱ ሲሆን በቀጣይ በቅርበት በመስራት አገልግሎቱን ውጤታማ ለማድረግ መረባረብ እንደሚስፈልግም ተሳታፊዎች ጠቁመዋል፡፡

Leave a Reply

Your email address will not be published. Required fields are marked *